मोठ्या उत्सुकतेने तिने त्याला आपल्या ओंजळीत उचलले.
'किती दिवस रे तुझी वाट पहायची? पण अखेर तू आलासच!' म्हणून त्याच्या ओठांचे चुंबन घेतले.
पण त्याच्यात काही बदल झाला नाही. तो शापित वगैरे नव्हताच मुळी!
'आज पुन्हा घात झाला! अशी किती रे दिवस फसगत होणार माझी? ही जातच मोठी फसवी. दुष्ट मेले! यांच्यावर कध्धीकध्धी विश्वास ठेवू नये! हाय दैवा, आजसुद्धा माउथवॉशने तोंड धुवावे लागणार!' ती हळहळली.
त्याच्यावर ढिम्म परिणाम झाला नाही. आपल्या निर्विकार, बटबटीत डोळ्यांनी तिच्याकडे बघत, 'डराँव' असे म्हणून, टुण्णकन उडी मारून तो समोरच्या दलदलीत पसार झाला.
